ကျွန်တော်နှင့် ပလောင်လူမျိုးများ

ကျွန်တော်လေ ဘာဇာတာများ ပါလာလို့လဲ မသိပါဘူး.. ခရီးတွေ တော်တော်သွားခဲ့ရပါတယ်.. တိုတို၊ ရှည်ရှည် တစ်လကို ၂ခေါက် ၃ခေါက်လောက် အမြဲလျှောက်သွားဖြစ်ပါတယ်.. အဲ့ဒီလိုမျိုး လျှောက်သွားရင်းနဲ့ မတွေ့ဖူးတာတွေ တွေ့ရ၊ မမြင်ဖူးတာတွေ မြင်ရတတ်ပါတယ်.. အခုတော့ ကျွန်တော် ခရီးသွားရင်း ရောက်ဖြစ်ခဲ့တဲ့ ပလောင်ကျေးရွာ က ပလောင်လူမျိုးတွေ အကြောင်း ကိုယ်တွေ့လေး ပြောပြမလို့ပါ..

ဟိုးတစ်လောက မိုင်းကိုင်ဘက် သွားရင်း လမ်းမှာ ပလောင်ရွာလေး တွေ့လို့ ကျွန်တော်တို့ အဖွဲ့တွေ ပါလာတဲ့ မုန့်တွေပေးရင်း အမှတ်တရ ဓာတ်ပုံလေးတွေ ရိုက်ဖြစ်ခဲ့ပါတယ်.. ပလောင်လူမျိုးဆိုတာ ပုံတွေ ထဲမှာပဲ တွေ့ဖူးခဲ့ပြီး သူတို့ အကြောင်း သေသေချာချာ မသိခဲ့ဘူးလေ.. အခု ကိုယ်တိုင် မြင်ခဲ့၊ စုံခဲ့ရတော့မှ သူတို့တစ်တွေက တကယ်ကို ရိုးစင်းတဲ့ တိုင်းရင်းသားတွေ ပါလားလို့ သိခဲ့ရပါတယ်.. ကျွန်တော် အရင်ကထင်ခဲ့တာ တစ်ခုရှိတယ်.. တိုင်းရင်းသားတွေဆိုတာ သူတို့ ၀တ်စုံကို အခန်းအနားတွေရှိမှ.. ပွဲတွေ သွားမှ ၀တ်တယ် ထင်ခဲ့တာ အခု ရှမ်းပြည်ရောက်လို့ တိုင်းရင်းသားတွေနဲ့ တွေ့မှပဲ အိမ်နေရင်းလဲဝတ်.. အမြဲတမ်းလဲ ၀တ်တတ်ကြတယ်ဆိုတာ သိရပါတော့တယ်..

ပလောင်လူမျိုးတွေကလဲ သူတို့ ၀တ်စုံကို အမြဲဝတ်တဲ့ လူမျိုးဖြစ်ပါတယ်.. သူတို့ရဲ့ ၀တ်စုံကတော့ Unique ဖြစ်တယ်လို့ ထင်ပါတယ်.. အမျိုးသားတွေကလဲ ဆံပင်တွေ အရှည်ကြီးတွေ ထားတာ တွေ့ရပါတယ်.. နားကပ်ကြီးတွေကို အမျိုးသားရော.. အမျိုးသမီးရောအကုန် ၀တ်ကြပါတယ်.. နဲနဲနောနော် မဟုတ်တဲ့ နားကပ်တွေ ပါပဲ.. နောက်ပြီး ကလေးမွေးပြီးတဲ့ အမျိုးသမီးတွေက ဂတုံး တုံးရတယ်လို့ သိရပါတယ်.. အဲ့ဒါကြောင့် ဆံပင်ရှိတဲ့ သူတွေက အပျိုတွေလို့ ခန့်မှန်းလို့ရပါတယ်.. ဂတုံးတုံးထားတဲ့ အမျိုးသမီးတွေက ပိတ်စ အဖြူကို ခေါင်းမှာ ပတ်ထားတာ တွေ့ခဲ့ရပါတယ်..

ပတောင်လူမျိုးအားလုံးမှာ ထူးခြားတာ နောက်တစ်ခု တွေ့ခဲ့ရပါသေးတယ်.. အဲ့ဒါကတော့ သွားအလှ ဆိုက်ကြတာပါပဲ.. သူတို့ရဲ့ သွားတွေကို ရွှေကပ်တွေ တက်ထားပြီး အဲ့ဒီ ရွှေသွားကပ်မှာ ပုံတွေ ဖော်ထားတာ ထူးထူးခြားခြား တွေ့ခဲ့ရပါတယ်.. သူတို့က ဆေးလိပ်သောက်တော့ သွားတွေ မလှလို့ လှအောင် ရွှေသွားတွေနဲ့ အလှဆင်ထားတာ ဖြစ်တယ်လို့ သိခဲ့ရပါတယ်.. မြို့ကသွားဆရာဝန်က လာပြီး အလှဆင်ပေးတယ်လို့ သိခဲ့ရပါသေးတယ်.. နောက်ပြီး သူတို့ရဲ့ အိမ်တွေကလဲ တစ်ခြား အိမ်တွေနဲ့မတူပဲ ခြေတံရှည် အိမ်ရှေ့မှာ ကွပ်ပစ် အမိုးလွတ်တွေ ရှိတာတွေ့ခဲ့ရပါတယ်..

သူတို့ ရွာက ကားလမ်းဘေးမှာ ရှိလို့ ကျွန်တော်တို့ အဖွဲ့ကားတွေရပ်ပြီး မုန့်တွေ ပေးရအောင်ဆိုပြီး ဆင်းခေါ်တော့ သူတို့တွေ အသီးသီး အိမ်ထဲ ပြေးဝင်ကြတယ်လေ.. ဘယ်လိုမှ ခေါ်လို့မရဘူး ဖြစ်သွားတယ်.. လူစိမ်းတွေ တွေ့တော့ သူတို့လဲ လန့်ပြီး ပြေးဝင်ကြတယ်နဲ့ တူပါတယ်.. ကျွန်တော်တို့ အဖွဲ့ကလဲ လူက အများကြီးလေ.. အဲ့ဒါနဲ့ပဲ မြန်မာလို တက်တဲ့သူကို ကူပြီးတော့ ခေါ်ပေးဖို့ ပြောတော့မှ၊ လက်ဆွဲပြီး လိုက်ခေါ်တော့မှ မလာချင်လာချင်နဲ့ ရောက်လာကြပါတယ်..

အစက ကျွန်တော်တို့ ပေးတာ ဘာမှန်း မသိတော့ မယူကြဘူး.. နောက် သေသေချာချာ ရှင်းပြတော့မှ ယူကြတယ်.. တဖြည်းဖြည်းနဲ့ လူစုလိုက်တာ အများကြီး ဖြစ်လာပါတယ်.. ကျွန်တော်တို့တွေလဲ ပလောင်တွေနဲ့ ဓာတ်ပုံတွဲရိုက်ကြ.. မုန့်တွေ ပေးလိုက်ကြနဲ့ ပျော်ခဲ့ကြရပါတယ်.. သူတို့လဲ ပျော်လာကြပါတယ်.. နောက်တော့ ကျွန်တော်တို့က ရိုက်ထားတဲ့ သူတို့ ပုံတွေ ပြန်ပြတော့ သူတို့တွေ ရီကြတယ်.. ပုံမှာ သူတို့ကိုယ်သူတို့ တွေ့တော့ အလုအရက် ၀ိုင်းကြည့်ကြတယ်.. ပလောင်မိန်းကလေးတွေကလဲ သူတို့ပုံတွေ တွေ့တော့ အသံထွက်ပြီးတော့တောင် ရီကြသေးတယ်..

အဲ့ဒီလိုနဲ့ သူတို့ရဲ့ ရိုးသားတဲ့ စိတ်ရင်းတွေကြောင့် ကျွန်တော်တို့တွေ ပျော်ရွှင်ခဲ့ကြရပါတယ်..

နေရာဒေသကွဲလို့ အခြေအနေတွေ မတူဘဲ၊ အလေ့စရိုက်တွေ မတူဘဲ.. ပုံစံတွေ ကွဲလွဲခဲ့ကြပေမဲ့လဲ.. ဒီမြေမှာ နေတာခြင်းတူ၊ လူမျိုးတစ်ခုတဲက ဆင်းသက်လာကြတာခြင်းတူ၊ စိတ်ထားတွေ တူကြတဲ့.. သွေးချင်းတွေ ဖြစ်တာမို့ အားလုံးဟာ မိနစ်ပိုင်းလေး အတွင်းမှာပဲ ရင်းနီးသွားခဲ့ကြပါတယ်.. ကျွန်တော့စိတ်ထဲမှာလဲ ကိုယ့်ရဲ့ အရင်းအခြာ ညီအစ်ကို၊ ညီအစ်မတွေနဲ့ ပြန်တွေ့ရသလို ခံစားခဲ့ရပါတယ်..

သူတို့ရွာ အပြန်လမ်းမှာဖြင့် ကျွန်တော့ စိတ်ထဲ ပျော်ရွင်မှုတွေ၊ ချမ်းမြေ့မှုတွေ.. နွေးထွေးမှုတွေ ရရှိခံစားလိုက်ရ သလို.. ကြည်နူးခဲ့ရပြီး.. နောင်အမြဲပဲ အောက့်မေ့ အမှတ်ရဖြစ်နေတော့မှာ သေချာပါတယ်..

ကျွန်တော်လဲ သူတို့နဲ့ တွဲဖက်ပြီး ဓာတ်ပုံ ရိုက်ခဲ့ပါသေးတယ်.. ကျွန်တော်က ပလောင်တွေထက် ရုပ်ပိုဆိုးနေလို့ ဖျက်ထားလိုက်ပါတယ်.. ၁၇ ပုံမြောက်က ကျွန်တော် သူတို့နဲ့ တွဲရိုက်ထားတဲ့ ပုံပါ.. :)