သီတင်းကျွတ်ည

ဒီနေ့က သီတင်းကျွတ် လပြည့်နေ့ဆိုတော့ ကျွန်တော်လဲ တစ်နေ့လုံး ဘုရားတွေ အနှံ့ရောက်ဖြစ်ခဲ့ ပါသေးတယ်.. စည်ကားများပြားနေတဲ့ လူအုပ်တွေကို ဘုရားတိုင်း လိုလိုမှာ တွေ့ခဲ့ရပါတယ်..

ကျွန်တော် ညဘက်ကြတော့ ဆီမီး (၉၀၀၀)နဲ့ ၀တ်ရွတ်ပူဇော်ပွဲတွေ ရှိတဲ့ စူဋ္ဌာမုနိဘုရား ကုန်းတော်ကို ရောက်ဖြစ်ခဲ့ပါတယ်.. ပွဲတော်ကြီးလိုမျိုး မဟုတ်ပေမဲ့လဲ ဆီမီး (၉၀၀၀)လှူတာနဲ့ ၀တ်ရွတ်ဖို့အတွက် ဘုရားရင်ပြင်တော် ပေါ်မှာတော့ လူကြီး၊ လူလတ်၊ လူငယ် အစုံပဲ စည်ကားစွာ ရောက်နေကြပါတယ်.. ရင်ပြင်တော်တလျှောက်မှာတော့ ဆီမီး (၉၀၀၀) ပူဇော်ပွဲ ဆိုတဲ့ စာတမ်းနဲ့ အတူ သရုပ်ဖော်ထားတဲ့ ဆီမီးခွက်တွေကို လှပ သေသပ်စွာနဲ့ တွေ့ခဲ့ရပါတယ်..

ည(၆)နာရီ ခွဲလောက်ရောက်တော့ နမောတသ (၃) ကြိမ် ၀ိုင်းဝန်းရွတ်ဆိုကြပြီး စတင်လို့ မီးထွန်းညှိကြ ပါတယ်.. ပြင်ဆင်ချိန် နဲသွားတဲ့အတွက် ရေနံဆီ မီးခွက်တွေ အစား ဖရောင်းတိုင်တွေနဲ့ ပူဇော်ခဲ့ကြရတာ ဖြစ်ပါတယ်.. အဲ့ဒါကြောင့် ဘုရားကုန်းတော်ပေါ်မှာ တိုက်တက်တဲ့ လေပြင်းကို အံတုပြီး ဖရောင်းတိုင်တွေ လင်းရဖို့အတွက် ပရိသတ်ပေါင်းများစွာက ကြိုးစားပမ်းစား ထွန်းညှိခဲ့ကြရတာ တွေ့ခဲ့ရပါတယ်.. ကျွန်တော်လဲ လေကပဲတိုက်နိုင်မလား ကိုယ်ကပဲ ထွန်းနိုင်မလားဆိုပြီး လေနဲ့အပြိုင် ၀င်ရောက် ထွန်းညှိခဲ့ပါသေးတယ်.. အချိန်ဆိုတာတွေ ဘယ်၍ဘယ်မျှ ကုန်သွားခဲ့တယ်တောင် မမှတ်မိခဲ့ပါဘူး.. ဘုရားပေါ်လာရောက်တဲ့ ဘုရားဖူးတွေကလဲ ဆီမီးထွန်းတဲ့ သူတွေကို လေကာပေးပြီး ၀ိုင်းဝန်းကူညီခဲ့ကြပါတယ်..

ဘုရားရှင်ကို ရည်စူးပြီး ပူဇော် ထွန်းညှိရတာဖြစ်လို့ ဘယ်နှာခါမှန်းမသိ ငြိမ်းနေတဲ့ ဖရောင်းတိုင်တွေကို စိတ်ရှည်လက်ရှည် မညီးမညူ ထွန်းညှိပူဇော်ခဲ့ ကြတဲ့သူတိုင်း ပီတိဖြစ်ကြရမှာ အမှန်ပါပဲ.. ဆီမီးတွေ ထွန်းနေတဲ့ အချိန်မှာပဲ ဓမ္မစကြာတရားတော်ကို ၀တ်ရွတ်အဖွဲ့ (၈)ဖွဲ့က သံပြိုင်ရွတ်ဆိုရင်း ဘုရားရှင်ကို ရည်မှန်းလို့ သီကြူးနေသံကိုလဲ ကြားနေရတာ စိတ်ချမ်းမြေ့ဖို့ အလွန်ကောင်းပါတယ်.. လေဝေ့တွေကြားကနေ ထိန်လင်းလာတဲ့ အလင်းရောင်များဟာလဲ ခဏတာပဲ ခံမှာ ဖြစ်ပေမဲ့လဲ အဲ့ဒီ အချိန်ပိုင်းလေး လင်းလက်သွားမှာကို ကြည့်ရှုရတာ စိတ်ချမ်းသာလို့ မဆုံးပါဘူး..

ညတော်တော်လေးကြာတော့ ဘုရားပေါ်ကနေ ကျွန်တော်ပြန်လာခဲ့ပါတယ်.. လမ်းတလျှောက်မှာတော့ ဆိုင်ကယ်တွေ အများကြီး ဘုရားဘက်ကို ဦးတည်သွားနေတာ တွေ့ခဲ့ရပါတယ်.. အစကတော့ စူဋ္ဌာမုနိဘုရားကို သွားတယ်ထင်ခဲ့မိတာ နောက်တော့မှ မီးပုံးပျံကွင်းသစ်ကို ချီတက်နေကြတာ ဖြစ်မှန်း သိလိုက်ရပါတယ်..

ယနေ့ည ကွင်းသစ်မှာ အပျော်တမ်း မီးပုံးပျံတွေ စမ်းသပ်လွတ်တင် ကြတယ်လို့ ကြားခဲ့ရပါတယ်.. တော်တော်များများလဲ အောင်မြင်စွာ လွတ်ခဲ့နိုင်တယ်လို့ ပြောသံကြားရပါတယ်.. လာကြည့်တဲ့ သူတွေနဲ့ စည်ကားပြီး ပွဲတော်ကြီးလို ဖြစ်နေတယ်လို့လဲ ပြောကြပါတယ်.. တောင်ကြီးမြို့ ကောင်းကင်မှာလဲ မီးပုံးပျံ အရွယ်စုံ လွှတ်တင်နေကြတာ မြင်တွေ့ရပါတယ်.. မိုးချုပ်သွားတဲ့အတွက် မီးပုံးပျံကွင်းကို မသွားနိုင်တော့ပေမဲ့ ကျွန်တော်လဲ အိမ်မှာ မီးပုံးပျံလေးတွေ လွှတ်တင်ဖြစ်ခဲ့ပါသေးတယ်.. စိတ်တွေကို မီးပုံးပျံတွေနဲ့ အတူ လွင့်မြောလွှတ်လိုက်ရင်း ကိုယ်ကိုယ်တိုင်လဲ လေဟာနယ်ထဲ စီးဆင်းသွားသလိုနဲ့ ကြည်နူးဖို့ ကောင်းတာ အမှန်ပါပဲ..

မနက်ဖြန်ညမှာတော့ တရားဝင် မီးပုံးပျံ စမ်းသတ် လွှတ်တင်ဖို့ ရှိပါတယ်.. နောက်ပြီး ဖွင့်ပွဲမှာ အသုံးပြုမဲ့ ယမ်း၊ မီးရှူးမီးပန်းတွေကိုလဲ စမ်းသပ်ဖောက်လွှတ်မယ်လို့ သိရပါတယ်.. ဒီနေ့ မရောက်ဖြစ်ခဲ့ပေမဲ့လဲ မနက်ဖြန်တော့ အရောက်သွားပြီး ကြည့်ရှုလေ့လာ လိုက်ပါဦးမယ်..

အခုတော့ ဘုရားသွားတုန်းက ရိုက်ဖြစ်ခဲ့တဲ့ ပုံအချို့ကို တင်ပေးလိုက်ပါတယ်.. ကင်မရာက ညဘက် ရိုက်လို့ သိပ်မကောင်းတဲ့ အတွက် တစ်မြို့လုံးအနှံ့ကို ပြည့်ပြည့်စုံစုံ မပြနိုင်ဘဲ ဖြစ်သွားတာကိုလဲ စိတ်မရှိကြပါနဲ့လို့ ပြောချင်ပါတယ်..

အားလုံးပဲ သီတင်းကျွတ် လပြည့်နေ့မှာတော့ စိတ်ချမ်းသာ ကိုယ်ကျန်းမာစွာနဲ့ ပျော်ရွင်ကြည်နူးနိုင်ကြ ပါစေကြောင်း ဆုမွန်ကောင်း တောင်းပေးလိုက်ပါတယ်..