ဘုရားအမှတ်စဉ်- ၆၆၄ အပိုင်း (၂)

မကြာခင်ပဲ သွားခေါ်တဲ့ကောင်လေးနဲ့အတူ အရွယ်မတိမ်းမယိမ်း ကောင်လေး ၁ ယောက် ပါလာပြီး သူက ကျွန်မတို့ကို အရံစေတီငယ်တွေက ပြုပြင်ဖို့ကုန်သွားပါပြီလို့ပြောပါတယ်။ ကျွန်မတို့ ၂ ယောက်လည်း အံ့အားသင့်ပြီး အရင်တခေါက်လာတုန်းကတော့ ပြုပြင်ဖို့ ဘုရားစာရင်းက တော်တော်များများ ကျန်နေပါသေးတယ်။ ၆ လအတွင်းမှာ ကုန်သွားတာ မြန်လိုက်တာဆိုပြီး သေချာအောင် ပြန်မေးရတာပေါ့။ ရန်ကုန်ကနေ လာရတာဖြစ်လို့ စာရင်းပြန်ကြည့်ပေးဖို့ ထပ်ပြောတော့ လွန်ခဲ့တဲ့ ၁ လ လောက်ကမှ မပြင်ရသေးတဲ့ ဘုရားစာရင်းကို စင်ကာပူက လှမ်းတောင်းလို့ ပို့ပေးလိုက်ရပြီး စင်ကာပူမှာရှိတဲ့ အလှူရှင်တွေက ပြင်မဲ့စေတီစာရင်းကို ပြန်ပေးတဲ့ အထဲမှာ အရံစေတီငယ်က မရှိတော့ပဲ စေတီကြီးတွေပဲ ပြင်ဖို့ကျန်တယ်ဆိုပြီး ရှင်းပြပါတယ်။ စေတီကြီးတဆူပြင်မယ်ဆိုရင်လည်း ကျပ် ၇ သိန်း သတ်မှတ်ထားတယ် ဆိုတော့ ကျွန်မတို့မှာ ပါလာတဲ့ ပိုက်ဆံနဲ့ ဘယ်လိုမှ မလောက်နိုင်ဘူးဆိုပြီး စိတ်ပျက်လက်ပျက် ခုံမှာ ထိုင်ချရင်းက လူက ငိုချင်လာသလိုလိုနဲ့ ဘယ်လိုလုပ်ရမှန်းလည်း မသိတော့ပါဘူး။ (အရံစေတီငယ်က ၂ သိန်းလို့အရင်က သိထားတာဆိုတော့ ၇ သိန်းဆိုရင် မှန်းထားတာထက် အရမ်းကွာနေတာပေါ့။)

စိတ်ထဲမှာလည်း ယူကြုံးမရ ဖြစ်မိတာက ဖြစ်ရလေ.. ရန်ကုန်ကနေ ဒီလိုလှူဖို့ ရည်စူးပြီးလာကာမှ မလှူရပဲ ပြန်သွားရရင်ဆိုတဲ့အတွေးက ခေါင်းထဲဝင်လာလိုက်၊ လှူဖို့ကံ မပါလို့လားဆိုပြီး စိတ်က ဖြစ်လိုက်၊ နောက်တခါဆိုရင်ရော.. အို.. နောက်တခါက နှစ်နဲ့ချီပြီးကြာမှာ ဒီကြားထဲလာနိုင်မှာမဟုတ်ဘူး ဆိုပြီး တွေးလိုက်နဲ့ အတွေးတွေ ရှုတ်ထွေးပြီး လူက ခရီးပန်းတဲ့အရှိန်ရော မထင်ထားတာကို ကြားလိုက်ရတဲ့အတွက်ရော ရင်ထဲစို့တက်လာမိပါတယ်။ အမောစို့တယ်ဆိုတာ ဒီလိုမျိုးပဲဖြစ်မှာလို့တွေးရင်း လမ်းလည်းမလျှောက်ချင်တော့ဘူး လူတကိုယ်လုံးလည်း အားမရှိသလိုဖြစ်ပြီး ဒူးတွေတောင် ယိုင်လာတယ်။ ကျွန်မအမျိုးသားက “ဒါဆိုရင်လည်း ရန်ကုန်ပဲပြန်တာပေါ့၊ အဓိကကတော့ ပျက်နေတဲ့ဘုရားတွေကို ဘယ်သူပဲ ပြုပြင် ပြုပြင်၊ ပြင်တဲ့သူက အရေးမကြီးပါဘူး ပြင်ပြီးဖို့ကသာ အရေးကြီးတာ၊ အခုကိုယ်လှူချင်တဲ့ ဘုရားတွေက ပြင်ထားပြီးသား လှူမဲ့သူ ရှိပြီးသားဆိုတော့ ကောင်းတာပဲပေါ့၊ သိပ်လည်း ခံစားမနေပါနဲ့ ရန်ကုန်ကနေသာ စေတီအကြီးအတွက် ငွေလွှဲပြီး လှူရအောင်ပါ” လို့အားပေးပြီး အာရုံခံတန်ဆောင်းမှာ ဘုရားသွားဖူးဖို့ ခေါ်တော့ ကျွန်မလည်း သွားဖို့ မတ်တပ်ရပ်လိုက်ရပေမယ့် စိတ်ထဲမှာတော့ ဘ၀င်မကျတော့ဘူး။ စိတ်မပြတ်သေးတာနဲ့ ဘုရားက တဆူမှ မကျန်တော့ဘူးလား စာရင်းသေချာ ပြန်ကြည့်ပေးပါအုံးဆိုတော့ သူတို့ဆီက မရှိတော့ပါဘူးဆိုတာပဲကြားရပါတယ်။

နောက်ဆုံးတော့ စိတ်ကို လျော့ချလိုက်ပြီး ဘယ်လို အရံစေတီအကြီးတွေကျန်နေသေးလဲဆိုတာ သိချင်တာရယ် ပြီးတော့ အခုကတည်းက ပြင်ချင်တဲ့ဘုရားကို တခါတည်းသတ်မှတ် ရွေးထားခဲ့မယ် ရန်ကုန်ရောက်မှ ဘဏ်ကနေ တဆင့် တောင်ကြီးကို ငွေလွှဲ လှူမယ်ဆိုတဲ့ စိတ်ကူးနဲ့ ပြင်ဖို့ကျန်နေသေးတဲ့ စေတီအကြီးတွေကို လိုက်ပြပေးပါလို့ စောစောက ကောင်လေးကို ပြောတော့ သူက ခဏစောင့်ပါဦး ဆိုပြီး အပြင်ပြန်ထွက်သွားပြန်ပါလေရော..

တအောင့်ကြာတော့ နည်းနည်း အသက်ကြီးတဲ့သူတယောက်ရောက်လာပြီး ကျွန်မတို့ကို ပြင်ရမဲ့ စေတီကို ပြဖို့ အာရုံခံတန်ဆောင်း သွားတဲ့ အလယ်လမ်းကနေ ခေါ်လာပါတယ်။ တဖြည်းဖြည်း အာရုံခံတန်ဆောင်းနားကို ရောက်ခါနီးကျမှ သူတယောက်တည်း ဘုရားနံပါတ်ကို ကြည့်လိုက် စာရင်းစာအုပ်ကို ကြည့်လိုက် အလုပ်ရှုတ်နေတာမို့ ကျွန်မတို့လဲ ဘာများပြောမလဲဆိုပြီး ရပ်စောင့်နေရတာပေါ့။ ခဏနေတော့မှ ” ဒီဘုရားက လှူမဲ့သူ မရှိသေးဘူး ” ဆိုတဲ့ စကားသံအဆုံးနဲ့ အတူ လမ်းမကြီးဘေးကပ်လျက် ဘုရားကနေ နံပါတ်စဉ် တခုသာ ခြားတဲ့ နောက်ထပ် ဘုရားပျက်တခုစီကို ခေါ်သွားပါတယ်။ အဲဒီ့ဘုရားကတော့ ဘုရားအမှတ်စဉ် - ၆၆၄ ပါ။ ဒီဘုရားဟာ လှူမဲ့သူမရှိသေးတဲ့အပြင် အပျက်အစီးလည်း သိပ်မများဘူး၊ အရံစေတီငယ်လည်း မဟုတ်ဘူး။ စေတီကြီးဖြစ်ပေမယ့် အပျက်အစီး သိပ်မရှိလို့ ပြုပြင်မယ်ဆိုရင် ၄ သိန်းလောက်ပဲ ကုန်ကျလိမ့်မယ်လို့လဲ ပြောရော ကျွန်မတို့လည်း လှူလို့ရပြီဆိုပြီး ၀မ်းသာသွားတယ်။ ကျွန်မ အမျိုးသားက ဒီလောက်ဆို လက်ထဲမှာရှိတဲ့ပိုက်ဆံနဲ့ လှူခဲ့လို့ရတယ် တခါတည်း အလှူငွေပေးခဲ့မယ် လို့ဆုံးဖြတ်ချက်ချလိုက်ပြီး အလှူငွေပေးဖို့ ဂေါပက ရုံးဘက်ကို ခြေလှမ်းပြန်လှည့်ရပါတယ်။ ဒီတခါ လှမ်းတဲ့ခြေလှမ်းက ပေ့ါပါးသွက်လက်ပြီး ကျွန်မ၀မ်းသာတာ ဘာနဲ့မှ နှိုင်းယှဉ်လို့မရအောင်ပါပဲ။ ရည်စူးထားတဲ့ အလှူဒါန တခုအတွက်ရော၊ လုပ်ဖို့ရာ တာဝန်ရှိနေတဲ့ ကိစ္စတခုကို အကောင်းဆုံးဖြစ်အောင် လုပ်နိုင်ခဲ့တဲ့အတွက်ရော၊ မလှူဖြစ်ဘူးလို့ ထင်ထားတဲ့ အလှူအောင်မြင်သွားတဲ့အတွက်ရော ကျွန်မ ကြည်နူးမဆုံး ၀မ်းသာမဆုံးတော့ပါဘူး။ အလှူငွေပေးပြီး ဘုရားရှိခိုးပြီးတာနဲ့ ကျွန်မတို့ မွေတော်ကက္ကူဘုရားက ပြန်လာတော့ နာရီက မွန်းလွဲ ၃ နာရီထိုးခါနီးနေပါပြီ။

၂၀၀၇ ခုနှစ် ဇန်န၀ါရီ ၁၀ ရက်နေ့က ပြုပြင်ခဲ့တာ အခု ဒီပို့စ်ကိုရေးတဲ့အချိန်မှာ ၆ လကျော်ရှိပြီမို့ ပြီးစီးလောက်ပြီလို့ ထင်ပါတယ်။ နောက်တခါ ထပ်မရောက်ဖြစ်တဲ့အတွက် ဘုရားပြုပြင်ပြီးသားကို လည်း ကျွန်မတို့ မမြင်ဖူးသေးပါဘူး။ တနေ့နေ့တော့ မွေတော်ကက္ကူဘုရားကို ထပ်သွားပြီး ပြင်ပြီးခဲ့တဲ့ဘုရားအတွက် အလှူရေစက်ချပွဲလုပ်မယ်လို့ ရည်မှန်းထားပါတယ်။

မွေတော်ကက္ကူဘုရားနဲ့ ပတ်သက်ပြီး ကျွန်မတို့ ဒါန ပြုခဲ့တဲ့ ဘုရားအမှတ်စဉ် ၆၆၄ ကို ဓာတ်ပုံနဲ့အတူ တောင်ကြီးချယ်ရီမြေကနေ ဝေမျှပေးလိုက်ပါရစေ..

မ ရန်ကုန်သူ